مرحبات وحدات متافكات و متحاذيات بيكم كاملين وبيكم كاملات، مرحبا بيا عندكم ومرحبا بيكم عندي، انا ابطيت عنكم بلاغرظي قصدي لوغرظي ما بطيت عنكم يغير الغايب حجتو معاه، بيا اللا من وحدة لوحدة اللا وحدة ارخاتني في الثانية، اللا من الذكرى كلت اقرب في السحاب.

انا بيا النضال وبيا الحماس الفياض ما انكًد انخلي ذكرى كيف ذكرة الوحدة الوطنية تتخطى ما أحظرت فيها وهون لاهي نتكلم عن الموضوعين لثنين الي شطنوني عنكم لثنين عين الدك في عين.

اللول منهم الوحدة اثرها كاع ما تشطن اللا حد ما تخلط لو غصة وكْرينا، وكالو اللولين عن السترة وزين لخلاكْ ما يخلطو يعمل كاع زين لخلاكْ عند شي من الرجلي  فيه لجر.

الوحدة كانت وعادت .. كانت ليد فليد، النية صادقة والقين فمولانا، ولانا مجملين لحد شي بنا باط كًازرينو بأدينا، و بفًام امدافعنا ولانا متلنيدين لحد ولانا مطايحين لو فليدين، و كالت الناس طاح اللي ما سندو اذراعو.

امال اليوم مسها ياسر من شي ماهو مباح ولاهو صاح، عادت اللا روغ لخلاكًات وكلها بميعينو وحدو، و بكْريعتو وحدو كيف الكيِْرع بليسنو مار حد ايحيسنو، ناتر اعلى زر وحاجلو عن ما سامك السماء ماهو هو وتكول الناس اللا ما شاف ابا راسو امال ايلوح الباسو.

واللا راني بعد كايلهالكم كاملين  والفوكْ عن فت يا خياتي حد بعد إبري من السركًة وايجيب اراكًن إيجرو اراهي دعوة، و فظاحة، وشينة، ولا يلتبس اعليها الباس. وأطم كاع اللا ذا الرجلي اللي عاد اللا لكتاب اللي يامر بالطهارة وهو الما ما إمسو.

شطنت السحاب اصا، قضية ثانية وأطويلة وبلا ظل وانا ماهي اشهادة أمحالية زعيم يغير ماهو عند السحاب اللا امنين ايجي عارظ امتين انكولكم الخير ايكوم اعليا شي من الرطيل والتهدريز ماهو شي تعرفوه وتبرك الخلعة في ركابية.

هاذي السحاب عدلت شي طاب وشي ما طاب فذا المخيم واللا الحمد لله اللي لرواح سالمة امال انا ماني رادها اعليكم ” كيكوطتي ” اتكادت فرحتها وخلعتها.

يغير انا بعد واللي كامل كيفي حامدين مولانا اعلى مجي ذي السحاب لمسلتين :

اللولى عنها يكْنتنا عن لحمادة ما اتكد اتعود وطن وحمرة العين للي كان متغشمي ونعتت انا عنا فاصلين في اترابنا وعنها فاصلة فينا.

والمسلة الثانية عن رجلينا مزال فيه ياسر الخيم، والمعونة، وكبر التخمام، والشمرة، والرحمة، والتكافل والنقد الذاتي فكدني بعدني ما نسيتو.واللا راجين عند الله ذا اللي اظهرنا به وقت الظيكْ يعملنا انتمو به وبالوحدة.